INGWIJIKHWEBU UKHOZI FM LUHLUKANISA UNYAKA

Ivukana, uSenzo 'Ntencane' Zondi ohlukanise unyaka emsakazweni Ukhozi FM. Isithombe : iReport South Africa
 

Nokwanda Ncwane

Kwenzeke okungajwayelekile namuhla, isiteshi somsakazo Ukhozi FM 'sihlukanisa unyaka'. Lesi siteshi sikhiphe uhla lwezingoma eziyishumi ezivotelwe ngabalaleli okwakumele zibawelise ku 2020. Ohlelweni luka 15:00 kuya ku 18:00  iSisonke Drive obelubanjwe ngokuhlanganyela uTshathugodo no Selbyonce.

Kuzokhumbuleka ukuthi, inkampani Michael Owens Productions yafaka isimangalelo enkantolo isola iSABC ngokuntshontsha umbono ka-Owen Ndlovu wengoma ehlukanisa unyaka, ukuqola izigidi zezimali kanye nokungagcini imigomo nemibandela yenkontileka okwavunyelwana ngayo.

Inkantolo yanquma ukufaka isivimbelo mhla zingama-31 kuZibandlela 2019 ukuthi lesi siteshi somsakazo singazidlali izingoma eziyishumi ezivotelwe ngabalaleli. Nokho, mhla zingama-28 kuMasingana nonyaka, u-Owen Ndlovu uhoxise isimangalelo sakhe bavumelana ngasese ne SABC.

Nalu uhla lwezingoma njengokuvota kwabalaleli.

10. Sami Tee ft Miano and KamuDee - Labantwana Ama Uber
9. Black Diamond - Ibhanoyi
8. Kaygee Daking & Bizizi ft Killer Kau
7. Samthing Soweto ft Shasha, DJ Maphorisa and Kabza De Small - Akulaleki
6. TNS ft Mpumi - Umona
5. DJ Sithelo ft SkyeWanda - Forever
4. DJ Tira ft Joocy - Thank You Me DJ
3. DJ Zinhle ft Mvzzle and Rethabile - Umlilo
2. Master KG - Jerusalem
1. Ntencane - Wawuthembeni

Ukhale wemuka nesicoco sengoma yonyaka uNtencane ngamavoti angu 433 142.