 |
| UNtsikelelo Nyauza okwesokunxele, egadulisana noLeonardo Castro okwesokudla, emdlalweni weligi obungempelasonto. Isithombe abe supersport.com |
Nokwanda Ncwane
Liqhubekile ishobolo lokunganqobi imidlalo elibhekene neqembu i-Orlando Pirates kulandela ukushawa izimbangi zayo ezinkulu iKaizer Chiefs emdlalweni womkhaya lezi zinkunzi zase Soweto ebezitholene kuwo ngoMgqibelo, eFNB Stadium.
Kulo mdlalo bekulindeleke ukuthi eziMnyama zibuyise izinduku kwazise ziwashiswe ijezi yiyo iKazier Chiefs emdlalweni womkhumula jezi we Telkom Knockout ngesonto eledlule. Lo mdlalo ububanjelwe eMoses Mabhida Stadium eThekwini. Amakhosi anqoba lo mdlalo sekukhahlelwa amaphenathi, ngemuva kokudlala ngokulingana.
Isiwombe sokuqala sivule ngegoli lika Ntsikelelo Nyauza okube umkhonto ogwaze ekhaya, kwalandela elika Leonardo Castro elenze yahamba phambili iChiefs ngamagoli amabili eqandeni. UVincent Pule uvalele phakathi i free kick ayizwe ngendaba unozinti weChiefs, uDaniel Akpeyi, ngomzuzu wama-39. Isiwombe sokuqala siphele Abafana bokuThula noXolo behamba phambili ngamagoli amabili kwelilodwa.
EziMnyama zibuye zingabaselwe esiwombeni sesibili zakha amathuba kubonakala zifuna ukuwunqoba umdlalo. UGabadinho Mhango wazo eziMnyama ulivalele enethini elokulinganisa ngomzuzu wama-60. Injabulo yeBhakaniya iqedwe uDaniel Cardoso ngomzuzu wama-84, evalela phakathi iphenathi Amakhosi ayithole ngemuva kokudlaliswa kabi ebhokisini kuka Bernard Parker. Amakhosi anqobe lo mdlalo ngamagoli amathathu kwamabili, ahamba nawo wonke amaphuzu amathathu.
Ephawula ngemuva komdlalo umqeqeshi weziMnyama ukhale ngamathuba ezakhe eziwatholile kepha zangawasebenzisa ngendlela. Uphinde wagxeka isenzo sabadlali sokubambana ngezihluthu enkundleni nokuholele ekutheni athole ikhadi elibomvu umdlali wasemuva weChiefs uEric Mathoho.
"Kubalulekile ukuthi abaqeqeshi bakhulume nabadlali bamaqembu abo mayelana nokuziphatha kahle enkundleni, bangaziphathisi okwezixhwanguxhwangu." kusho uRhulani Mokwena.
EziMnyama zilele endaweni yesishiyagalolunye ngamaphuzu ayi-13 ngemuva kwemidlalo eyi-11. Izimbangi zayo ezinkulu, Amakhosi aqhwakele esicongweni se log ngamaphuzu angama-28 ngemuva kwemidlalo eyi-11. Amakhosi avule igebe lamaphuzu ayishumi njengoba elandelwa iMamelodi Sundowns elele isibili, ngamaphuzu ayi-18 ngemuva kwemidlalo eyishumi.
